អារាមនៅថៃលាយជំនឿពុទ្ធសាសនា និងវិទ្យាសាស្រ្ត
ព្រះសង្ឃនិមន្តក្នុងទីធ្លាដ៏ស្រស់ត្រកាលនៃវត្តរ៉ុងឃុន ដែលមានអារាមសក្បុស នៅក្រុងឈាងរ៉ៃ ប្រទេសថៃ។
ខុសពីវត្តសាសនាព្រះពុទ្ធដទៃទៀត វត្តរ៉ុងឃុន នៅក្រុងឈាងរ៉ៃ ប្រទេសថៃដែលត្រូវបានរចនាឡើងឆ្នាំ១៩៩៧ ដោយវិចិត្រករ និងស្ថាបត្យករថៃឈ្មោះ ឆាឡើមឆាយ កូស៊ីតពីផាត គឺជាអារាមដែលមានការច្របាច់បញ្ចូលរវាងជំនឿសាសនា និងការស្រមើស្រមៃបែបវិទ្យាសាស្ត្រ។
គ្រប់ទីកន្លែងសុទ្ធតែត្រូវបានលាបពណ៌សក្បុស តំណាងឲ្យភាពបរិសុទ្ធរបស់ព្រះពុទ្ធ។ រីឯបំណែកកញ្ចក់នៅលើសំណង់ជាមួយពន្លឺសូរ្យសែងធ្វើឲ្យអារាមចែង ចាំងដូចគ្រាប់ពេជ្រ។
នៅបរិវេណអារាម មានចម្លាក់ប្លែកៗជាច្រើនដូចបិសាច ក្បាលខ្មោច និងលលាដ៍ព្យួររណេងរណោងលើដើមឈើ។
នៅចំកណ្ដាលអារាម មានបុប្ផាពណ៌មាសត្រូវបានរចនាដាក់ជាតង្វាយដល់បដិមាដែលគង់នៅចំ កណ្ដាល ហែរហមដោយរូបទេវតាហោះហើរលើអាកាស។
លោក ឆាឡើមឆាយ កូស៊ីតពីផាត ដែលស្ថាបនិកអារាមរ៉ុងឃុន មានគោលបំណងចង់ឲ្យទីនេះក្លាយទៅជាកន្លែងក្រេបជញ្ជក់ចំណេះដឹង និងជាសាលសមាធិសម្រាប់ប្រជាជនក៏ដូចជាភ្ញៀវទេសចរ ដើម្បីស្វែងយល់ពីព្រះធម្ម ពុទ្ធិ និងកម្មផល តាមការប្រៀនប្រដៅរបស់ព្រះពុទ្ធ។
មកទល់បច្ចុប្បន្ន ការកសាងវត្តរ៉ុងឃុន នៅមិនទាន់បានបញ្ចប់ទេ បើទោះជាវត្តមានអាយុជាង១៦ឆ្នាំហើយក្ដី។
បរិវេណវត្តសលើផ្ទៃដីជិត២ហិកតានេះ ត្រូវការសំណង់ចំនួន៩បន្ថែមទៀតរួមមានព្រះវិហារ ឈាបនដ្ឋាន សាលាឆាន់ សាលាសុំសីល អាស្រមឥសី សារមន្ទីរ ពុទ្ធិកសាលា បន្ទប់ទឹក និងពន្លាដើម្បីបង្គ្រប់លក្ខណៈជាវត្តមួយដ៏ពេញលេញ៕ PRភ្នំពេញប៉ុស្ត៍
