ឃាត់ខ្លួនប្រធានផ្នែកព្រហ្មទណ្ឌស្រុកក្រគរ ពីបទរំលោភអំណាចនិងសូកប៉ាន់ចៅក្រម
ខេត្តពោធិ៍សាត់ ៖
នាយផ្នែក នគរបាលយុត្ដិធម៌នៃអធិការដ្ឋាននគរបាលស្រុកក្រគរ
ខេត្តពោធិ៍សាត់ដែលទើបតែមកកាន់តំណែងបានថ្មីថ្មោងនោះ
ត្រូវបានប្រភពព័ត៌មានទម្លាយឲ្យដឹងថាត្រូវ
កងរាជអាវុធហត្ថឃាត់ខ្លួនដើម្បីសាកសួរកាលពីរសៀលថ្ងៃទី២៩ ខែមីនា
ឆ្នាំ២០១៣
នៅទីបញ្ជាការកងរាជអាវុធហត្ថស្រុកក្រគរដោយការឃាត់ខ្លួននោះមានការ
ចូលរួមពីមន្ត្រីតុលាការផងដែរ។
លោក ហង្ស ប៊ុនធឿន អតីតមេប៉ុស្ដិ៍នគរបាលឃុំកំពង់លួង ហើយត្រូវផ្លាស់ប្ដូរទៅកាន់តំណែងថ្មីជានាយផ្នែក នគរបាលយុត្ដិធម៌នៃអធិការដ្ឋាននគរបាលស្រុកក្រគរ ត្រូវបាននាំចូលទៅក្នុងរថយន្តលុចស៊ីស RX300 ពណ៌ខ្មៅ ហើយក៏ត្រូវដឹកបញ្ជូនយ៉ាងប្រញាប់ប្រញាល់ទៅកាន់ខេត្តពោធិ៍សាត់ ។ ការឃាត់ខ្លួនជនសង្ស័យគឺឃាត់តាមដីកាលេខ០៦ ដ.ន/១៣ ចុះថ្ងៃទី២៩ ខែមីនា ឆ្នាំ២០១៣ ដោយចោទប្រកាន់ជាច្រើនបទល្មើស មានទាំងមជ្ឈិមនិងឧក្រិដ្ឋ ចេញដោយ លោកម៉ៅ ស៊ីណា ចៅក្រមស៊ើបសួរ សាលាដំបូងខេត្ដពោធិ៍សាត់ ។
ជនសង្ស័យត្រូវ បានបញ្ជូនទៅដាក់ពន្ធនាគារបណ្ដោះ អាសន្នហើយកាលពីល្ងាចថ្ងៃទី២៩ ខែមីនា ឆ្នាំ២០១៣ ដោយចោទពីបទ ១-រំលោភអំណាច, ២-បដិសេធការអនុវត្ដសេចក្ដីសម្រេច របស់តុលាការ និង៣-សូកប៉ាន់ចៅក្រម ។ នេះជារឿងគួរឲ្យភ្ញាក់ផ្អើលមួយ ដែលគ្រប់ៗគ្នាកំពុងតាមដានយ៉ាងយកចិត្តទុកដាក់ ៕ដោយវត្តភ្នំ
