លោក បាន គីមូន៖ វិបត្តិកូរ៉េអាចដល់ដំណាក់កាល “មិនអាចគ្រប់គ្រងបាន”

អគ្គលេខាធិការអង្គការសហប្រជាជាតិលោក បាន គីមូន បានព្រមានថា វិបត្តិក្នុងតំបន់ឧបទ្វីបកូរ៉េអាចឈានដល់ស្ថានភាពដែល “មិនអាចគ្រប់គ្រងបាន”។

ថ្លែងក្នុងសន្និសីទសារព័ត៌មានក្នុងទីក្រុងរ៉ូម ប្រមុខស្ថាប័នកំពូលខាងលើបានជំរុញឲ្យកូរ៉េខាងជើងកាត់បន្ថយ ”សកម្មភាពបង្កហេតុរបស់ខ្លួន” ហើយងាកមកបើកទ្វារតំបន់ឧស្សាហកម្មចម្រុះរួមគ្នារវាងកូរ៉េខាងជើង-កូរ៉េខាងត្បូងឲ្យដំណើរការឡើងវិញ។

អគ្គលេខាធិការអង្គការសហប្រជាជាតិលោក បាន គីមូន ថ្លែងប្រាប់អ្នកសារព័ត៌មានក្នុង
ទីក្រុងរ៉ូម ថា ស្ថានការណ៍នៅឧបទ្វីបកូរ៉េអាចកាន់តែដុនដាបឡើង (រូបភាព៖ thejournal)

ស្រប ពេលដែល អ្នកវិភាគជាច្រើនថា កូរ៉េខាងជើងកាន់តែខិតជិតដល់ពេលបាញ់សាកល្បងមីស៊ីលរបស់ខ្លួនមែន ទែននោះ មេបញ្ជាការជាន់ខ្ពស់អាមេរិកលោក Samuel Locklear ដែលជាប្រមុខបញ្ជាការយោធាអាមេរិកប្រចាំតំបន់ប៉ាស៊ីហ្វិកនិយាយ ថា អាមេរិកនឹងបាញ់ទម្លាក់មីស៊ីលរបស់កូរ៉េខាងជើងនាពេលខាងមុខ ប្រសិនបើស្ថិតក្នុងលក្ខខណ្ឌការពារសម្ពន្ធមិត្តរបស់ខ្លួន ឬអាមេរិកផ្ទាល់។

ទន្ទឹមនឹងការ គំរាមកំហែងជាបន្តបន្ទាប់ពីសំណាក់កូរ៉េខាងជើង គេសង្កេតឃើញអាមេរិក ក៏ដូចជាសម្ពន្ធមិត្ត កូរ៉េខាងត្បូង និងជប៉ុនសុទ្ធតែដំឡើងខែលការពារមីស៊ីលដើម្បីប្រុងជើងប្រួលការពារ អស់ហើយដែរ។

កាលពីថ្ងៃអង្គារម្សិលមិញ ទីក្រុងព្យុងយ៉ាងបានព្រមានដល់ជនបរទេស ដែលរស់នៅកូរ៉េខាងត្បូងត្រូវប្រញាប់ជម្លៀសចេញ ដោយបញ្ជាក់ថា សង្គ្រាមនុយក្លេអ៊ែរខិតជិតកាន់តែកៀកហើយ។ មិនតែប៉ុណ្ណោះ របបរបស់មេដឹកនាំវ័យក្មេង គីម ជុងអ៊ុន បានបិទច្រកឧស្សាហកម្មរួមគ្នាជាមួយកូរ៉េខាងត្បូងដែលប្រៀប ដូចជាការកាត់ផ្ដាច់ដង្ហើមចុងក្រោយនៃចំណងទំនាក់ទំនងប្រទេស ទាំងពីរកូរ៉េខាងជើង-កូរ៉េខាងត្បូងដែរ៕

ប្រែសម្រួល៖ Zac
ប្រភពពី៖សប្បាយ Channelnewsasia, BBC

Angkor Song

លោក បាន គីមូន៖ វិបត្តិកូរ៉េអាចដល់ដំណាក់កាល “មិនអាចគ្រប់គ្រងបាន”