យុទ្ធនាការទប់ស្កាត់”គ្រឿងស្រវឹងនិងការផ្សាយពាណិជ្ជកម្ម”

បាត់ដំបង៖ គ្រឿងស្រវឹងគឺជាមូលហេតុចម្បងទី២នៃគ្រោះថ្នាក់ចរាចរណ៍ដែលបណ្តាលឲ្យមានអ្នកស្លាប់ជាង១៩០០ និងមានអ្នករបួស៥៨០០នាក់ និងខាតបង់ថវិកាអស់ជាង៣១០ដុល្លារជារៀងរាល់ឆ្នាំ នៅកម្ពុជានេះបើតាមរបាយការណ៍អង្គការជនពិការអន្តរជាតិឆ្នាំ២០១១។

ទោះបីមានសារាចរណែនាំនៅ ថ្ងៃទី០៩ ខែធ្នូ ឆ្នាំ២០១១ មិនឲ្យផ្សព្វផ្សាយស្តីពីការផ្សាយពាណិជ្ជកម្មគ្រឿងស្រវឹងលើប្រព័ន្ធផ្សព្វផ្សាយនានា ទូរទស្សន៍វិទ្យុ។ល។ ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មានក្តីប៉ុន្តែនៅតែកើតមានដដែលមិនមានការហាមឃាត់នៅឡើយ។

នៅព្រឹកមិញនេះថ្ងៃទី០១ ខែមករា ឆ្នាំ២០១៣ មជ្ឃមណ្ឌលភីឌីភី(PDPCenter) និងអង្គការចលនាដើម្បីសុខភាពកម្ពុជាដោយមានការចូលរួមពីអាជ្ញាធរក្រុងកងកម្លាំងប្រដាប់អាវុធ និងសិស្សានិសិស្សជាង២០០នាក់ បានលើកបដាក្រោមប្រធានបទ ស្តីពី ”គ្រឿងស្រវឹងនិងការផ្សាយពាណិជ្ជកម្ម” បានហែរជាក្បួនដើរជុំវិញដងផ្លូវនានាក្នុងក្រុងបាត់ដំបងដើម្បី ផ្សព្វផ្សាយ។

លោក ឡាច ម៉ាន់ អភិបាលរងក្រុងបាត់ដំបងជាគណៈអធិបតីបានឲ្យដឹងថា លោកមានឆន្ទៈមោះមុតគាំទ្រគោលនយោបាយ ស្ដីពីគ្រឿងស្រវឹង ជាពិសេសការរិតត្បិតការផ្សាយពាណិជ្ជកម្មអាយុ នៃការប្រើប្រាស់ទីកន្លែងចែកចាយពេលវេលានិងការតំឡើងពន្ធឲ្យខ្ពស់។ ហើយយុទ្ធនាការថ្ងៃនេះ គឺពិតជាមានសារៈសំខាន់ក្នុងការកាត់បន្ថយការប្រើប្រាស់គ្រឿងស្រវឹង។

លោក ម៉ៃ កុសល មន្ត្រីមជ្ឈមណ្ឌលភីឌីភីអ្នកអនុវត្តន៍គោលនយោបាយគ្រឿងស្រវឹងថ្លែងថា យុវជនដែលមានអាយុ១០ទៅ២៤ឆ្នាំប្រមាណ៩០.៧% និងស្ត្រីចំនួន៧០% បានប្រឡូកខ្លួនទៅក្នុងការប្រើប្រាស់គ្រឿងស្រវឹង។ លោកបន្តថា ស្ត្រី ម្នាក់នៅខេត្តស្វាយរៀងក្រោយពីគាត់ឈប់ផឹកស្រាគាត់មានជីវភាពធូរ ធារមានប្រាក់ទិញសម្ភារៈប្រើប្រាស់ច្រើនក្នុងផ្ទះរបស់គាត់។

លោកបន្តថា គ្រោះថ្នាក់ចរាចរណ៍បណ្តាលមកពីការប្រើប្រាស់គ្រឿងស្រវឹង១៣% ដែលមានអ្នកស្លាប់ភាគច្រើនអាយុចន្លោះពី២០ទៅ៣៩ឆ្នាំមាន៧៥% បើប្រៀបធៀបកើន១៦%ក្នុងឆ្នាំ២០១០។

លោកបន្តទៀតថា ការយល់ដឹងរបស់ប្រជាពលរដ្ឋនៅមានកម្រិត ការផ្សព្វផ្សាយពីផលប៉ះពាល់អវិជ្ជមានមិនទាន់ទូលំទូលាយនិងការអនុវត្តន៍ច្បាប់មានស្រាប់ខ្វះចន្លោះក្រុមហ៊ុន ឧស្សាហកម្មគ្រឿងស្រវឹងចំពោះសក្តានុពលរបស់ខ្លួនកាន់តែខ្លាំងឡើងៗ ដើម្បីជំរុញការប្រើប្រាស់។ ក្រុមហ៊ុនបានប្រើគ្រប់មធ្យោបាយដើម្បីទាក់ទាញអ្នកប្រើប្រាស់ តាមរយៈការផ្តល់រង្វាន់(ឡានលុយមាសទូរទស្សន៍...) ការប្រើស្រីស្អាត ប្រុសស្អាត ដើម្បីផ្សព្វផ្សាយនិងប្រើសារបំភ័ន្តពីការពិតដូចជាផឹកស្រាកែរោគ ផឹកស្រាបង្កើនចំណងមិត្តភាព ផឹកស្រាមានកម្លាំងម៉ាំមួន ជាដើមហើយពួកគេបានប្រើប្រាស់ប្រព័ន្ធផ្សព្វផ្សាយយ៉ាងគគ្រឹកគគ្រេងពីផលិតផលរបស់គេដោយមិនខ្វល់ពីសុខុមាលភាពប្រជាពលរដ្ឋនិងសុខុមាលភាពសង្គម គឺធ្វើយ៉ាងណាឲ្យតែបានចំណេញប៉ុណ្ណោះ។

លោក ណយ សូភី នាយផ្នែកការិយាល័យចរាចរបានឲ្យដឹងថា ក្នុងខេត្តបាត់ដំបងឆ្នាំ២០១២គ្រោះថ្នាក់ចរាចរណ៍កើតឡើងចំនួន៣៧១លើក ថយចុះ២៥លើកបើប្រៀបធៀបឆ្នាំ២០១១ស្លាប់១១៦នាក់ របួសធ្ងន់ស្រាល៦៥៧នាក់មូលហេតុស្រវឹង៤៩លើក។

លោកបន្តថា សុំឲ្យការផ្សាយពាណិជ្ចកម្មរបស់ក្រុមហ៊ុនលក់គ្រឿងស្រវឹងគ្រប់ប្រភេទ កុំគិតតែប្រយោជន៍ខ្លួនឯងខ្លាំងពេកគិតពីគ្រោះថ្នាក់ផង ហើយសមាជិកថ្មីនោះគ្មាននណាក្រៅពីក្រុមយុវជនជំនាន់ក្រោយទេ។

លោក មុំ គង់ នាយកប្រតិបតិ្តអង្គការចលនាដើម្បីសុខភាពកម្ពុជាថ្លែងថា គ្រឿងស្រវឹងមិនត្រិមតែជាមូលហេតុបណ្តាលឲ្យមានគ្រោះថ្នាក់ប៉ុណ្ណោះទេ ប៉ុន្តែជាដើមហេតុនៃជំងឺបញ្ហាសង្គមនិងអំពើហឹង្សា។ លោកបន្តថា យុទ្ធនាការស្តីពីគ្រឿងស្រវឹង និងធ្វើជារៀងរាល់ឆ្នាំដើម្បីបង្កើនការយល់ដឹងដល់ប្រជាពលរដ្ឋអំពីឥទ្ធិពលនៃការផ្សាយពាណិជ្ជកម្មគ្រឿងស្រវឹងទៅលើការបើកបរនិងសំណូមពរឲ្យមានច្បាប់ត្រួតពិនិត្យគ្រឿងស្រវឹងឲ្យបានឆាប់រហ័ស៕

ណារីន